दिल्ली, दि. 24 : सामाजिक कार्यकर्ते आणि शिक्षण सुधारणा तसेच पर्यावरण संवर्धनासाठी ओळखले जाणारे सोनम वांगचुक यांनी तब्बल 26 दिवसांनंतर आपले बेमुदत उपोषण समाप्त केले. केंद्रीय मंत्र्यांशी झालेल्या चर्चेनंतर आणि सरकारकडून काही महत्त्वाच्या मागण्यांवर लेखी आश्वासने मिळाल्यानंतर त्यांनी हा निर्णय घेतल्याचे सांगितले.
गुरुग्राममधील रुग्णालयात केंद्रीय मंत्री जे. पी. नड्डा आणि डॉ. जितेंद्र सिंह यांच्या उपस्थितीत वांगचुक यांनी उपोषण सोडले. त्यांच्या उपोषणाला देशभरातील विद्यार्थी, विविध सामाजिक संघटना आणि अनेक खासदारांचा पाठिंबा मिळाला होता.उपोषण सोडल्यानंतर सोनम वांगचुक यांनी सांगितले की, “हे उपोषण संपले असले तरी जबाबदारीची लढाई संपलेली नाही.” त्यांनी शांतता राखण्याचे आवाहन करत सरकारने दिलेली आश्वासने प्रत्यक्षात उतरवण्यावर भर दिला.
सरकारने शांततापूर्ण आंदोलनकर्त्यांवर कारवाई न करण्याचे, परीक्षांमधील गैरव्यवहारांबाबत आवश्यक पावले उचलण्याचे आणि संबंधित मुद्द्यांवर पुढील चर्चा करण्याचे आश्वासन दिल्यानंतर वांगचुक यांनी उपोषण मागे घेतले. मात्र, आंदोलनाशी संबंधित संघटनांनी आपला लढा सुरूच ठेवण्याचा निर्धार व्यक्त केला आहे.
